Read on Twitter
للأسف فيه ناس كتير من الطبقة المثقفة النضيفة (أخلاق و تربية)، سابوا البلد بسبب مُرسي و أتباعه... دلوقتي تبص حواليك و تقول لنفسك::: مين دووول؟ صحيح شيلنا الأخوان من الحكم، بس المشهد لا يبشر بالخير! واضح إن الغزوات الفكرية الممنهجة جابت نتيجة..
و للأسف.. أمثال "مجانس" بياكلوا عيش على قفا النوعية دي! لو عايز فتوى في أي شىء، إقطع تذكرة عشان تتفرج على عرض "الساحر"! صحيح الوطن عمره ما يتهز مهما مشي منه ناس.. بس شكل المجتمع إتغير.. مش فكرة معتقدات و أفكار بقدر ما هي فكرة مفهوم "الجمال" اللي إندثر ..
الجمال في الكلام و المظهر و السلوك و التعامل و العلاقات... الجمال في كل شيء! حل مكانه اللا ذوق... مجرد ناس بتتملى كلام و أوامر ، بيخوفوهم من الحياة و من نفسهم .. و للأسف ما عندهمش رصيد ثقافة أو تعليم عشان يفكروا و يختاروا! الدقون و الجلاليب و الفكر الداعشي اللي مغروز في دماغهم
مصر اللي كان فيها يونانيين و أرمن و لبنانيين و طوائف أخرى، و مصريين مثقفين بيتكلموا فرنساوي و إنجليزي و بيقروا كتب و عندهم فكر و حُجة و إبداع ... حتى البسطاء كانوا راقيين، حتى لو مافيش تعليم و لا فلوس .. لكن تربيتهم كانت راقية!
دلوقتي ينزلك "شحط" طويل و عريض من عربية مرسيدس ، و تلاقيه ما بينطقش غير شتايم ... كأنك فتحت غطاء بلاعة ... طريقة كلام بلطجي ، عايز يشتم و يمد إيده قبل ما يتكلم .. و إنتشرت ثقافة "مجانس" .. اللي هي ثقافة التطاول على الناس.. بحجة اللبس أو الأوامر الإلهية ... تطاول يصل لحد التحريض
التغيير اللي بيحصل في البلد "جميل" .. لكن أخشى إن الشعب اللي موجود دلوقتي يفتقد أشياء كثيرة ... يمكن تطبيق القانون يرجع بعض الأشياء ، لكن الجمال و الأخلاق و التربية ، راحت تتفسح بره مع الناس اللي طفشت! فاضل قلة قليلة ... و معظمهم حاسين بالغُربة وسط الفوضى!
معظم الشباب فاهمين "الحرية" إنها عربية أخر موديل تمشى على أعلى سرعة ... فاهمين إن الحرية بنزين من غير فرامل! عشان كده العربية الجميلة دايماً بتعمل حوادث ... عشان مافيهاش فرامل ! الحرية معاهم عمرها محدود ، بتخلص بخناقة أو تعدي أو خصام .. الفرامل بتاعة الحرية إسمها ::: إحترام!!!
